ferradura en tránsito

Xuro que loitarei para que a miña lingua alcance o máis amplo uso social, dentro e fóra da miña comunidade, e obteña a máxima difusión e recoñecemento en todos os ámbitos sociais.(Noeli Pocaterra)

de viños, memoria

Filed under: restaurantes,culinaria — 16 Febreiro 2009 @ 11:23 a.m.

Que tardara un ano en escribir unha anotación sobre viños, non ten moita explicación. Non son bebedor habitual, só ocasional, mais téñome por un catador bastante decente. Éme imposíbel beber viño como auga, se cadra é por iso que non teño o padal viciado.

En fin, creo terlle escoitado a Manuel María que X. L. Méndez Ferrín é partidario, como o foi Otero Pedraio, do dito “hai que ser nacionalista en todo, menos no viño”. En fin, o que menos importa é quen dixera este aserto, que eu non comparto e que combato. O viño é a expresión licuescente da terra, da terra e do traballo humano. Cústame crer que Pedraio, sendo da boca do Ribeiro, tivera esa opinión. O mesmo que Ferrín. Entenderíao se a persoa en cuestión fora dunha terra de caldos amorfoideos. Entenderíao se na Galiza non houbera bos viños, porén é algo do que podemos presumir,  e presumir moito. Atopar noutro lugar da península a variedade e cualidade dos nosos viños? Busquen, busquen; e se queren miren para fóra e sigan buscando…

Noutra ocasión hei falar da miña memoria requeté. Requeté era don Joaquín Barquín Caller y García de Pesquera, conde de Norman, persoa de trato agradábel e bon bebedor. Nunha ocasión, para celebrar que a súa motricidade mellorara  moitísimo, fun con el e de viños. Levoume polos bodegóns do centro de Madrid, que eu xa coñecía, por outra banda, porque era onde eu lle mercaba as garrafas de viño. Púxenlle unha condición, o derradeiro pousadoiro tocábame escollelo a min. Así foi. Tras varias paraxes na mañá, catro, creo lemabrar, leveino a un bar nunha das rúas que van dar á Principe, segundo se vai cara a Santa Susana pola marxe dereita, disimulen que non lembre o nome. Era un bar onde  eu sabía que había Ribeiro. Cunha simple cunca pillou un cagallón monumental, trousou en plena beirarrúa e tiven que levalo agarrado á casa, na mesma Príncipe, fronte ao Teatro da Comedia.

Cando os meus pais colleron o traspaso do Rincón, na Alagalia de Arriba compostelá, antes de eu nacer xa puxeran taberna na casa que habitaron, antes de ir para a planta da luz de Abral, da estrada a Santiago. E meu pai, de como tratar o bebedores de viño sabía moito máis do que eu imaxinaba. Por exemplo que eran tres  os surtidores dos que se abastecían as tabernas compostelás do Franco. Iso eu ignorábao mais non que ese viño provocaba úlceras e dores de cabeza, un compañeiro, Anxo, o home con máis memoria que coñecín nunca (nun mes aprendeu de memoria a Ilíada e a Odisea, en grego e castelán, e non erraba nin onde unha mosca defecara enriba do a) botara un curso indo de viños todo a ano… e ao seguinte tamén ía: de tilas. Volvendo ao conto que contaba, meu pai introduciu en Santiago o viño da Ribeira Sacra, e bebedores que antes tiñan dores de cabeza polas noites…deixaron de telas en canto deixaron as purrelas e empezaron a beber viño como deus manda. Empezaban bebendo unha cunca, por probar, mais, pasando os días, bebían menos nos outros locais e duplicaban e triplicaban  o consumo no noso.

Resulta iconpleta esta primeira anotación, mais por i e por en, non quero rematar sen comentar isto. Un viño moderno é un viño con corpo, non unha purrela frouxa nin un desmande de graos alcolíferos que te tunde aos dous vasos. Un bon viño é como un bon poema. Sabe acompañar, sen perder personalidade fronte aos sólidos que inxerimos e sen impoñer o seu tracto por riba deles. E cando se cata só non desmerece a ninguén.

Un dos mellores viños que teño probado é o Sabatelius. Ao viñateiro coñézolle actividade como músico, poeta, pintor, escultor, canteiro e estaba seguro que non había facer un mal viño…mais cando llo probei por primeira vez ningún rioxa lle podía, nin ningún Chianti, que sempre fora dos meus preferidos.

Non hai comentarios

No comments yet.

RSS feed for comments on this post.

Sorry, the comment form is closed at this time.