ferradura en tránsito

Xuro que loitarei para que a miña lingua alcance o máis amplo uso social, dentro e fóra da miña comunidade, e obteña a máxima difusión e recoñecemento en todos os ámbitos sociais.(Noeli Pocaterra)

primeira noticia dos minipedros (i)

Aparentemente non se lle notaba nada. Porén, un pai é un pai, é dicir: case unha nai.

-Todo ben no cole?

Ío non me mirou. Meteuse a correr no cuarto,  en canto eu penduraba a chaqueta no percheiro e poñía as zapatillas. Despois, como o vin concentrado nos deberes, dirixinme á cociña e algo andaba cacharreando cando o sentín.

-sabes?, papá.

-Que foi?, meu.

-mandáronme escribir unha historia para o Día da Biblioteca. Sabes? Podían encargarlla a calaquera, mais chamáronme só a min.

-Caramba! Parabéns! É toda unha honra que te escolleran só a ti.

-ben me decato, ben me decato e estou contento, estou contento e faime moita ilusión.

Pode que na conversa falaramos de máis cousas, é posíbel, non podo aseguralo. Probabelmente o que pasou foi a Ío o reabsorberon os deberes e a min calquera outra tarefa. Lembro preguntarlel algo e a súa resposta.

-estamos vendo as partes do corpo. O exame á pasado mañá, se se acorda, porque ten unha cabeciña…

-É certo, a túa profesora adía os exames con moita ferecuencia, porén ti estuda como se fora para mañá, logo é cousa se repasar nada máis.

-non, se xa o sei, xa o estudei e seino, o que me preocupa é outra cousa…

Foi escoitalo e aparecer onda el. Así como se non fora por iso. Intereseime no que estaba facendo.

-as multiplicacións xa as fixen, agora estou pintando.

Corrixinllas. Estaban ben, non se despistara.

-Que é o que pintas?

-non podo dicircho, papá.

-Como non podes dicirmo?, a min podes dicirme o que sexa, xa sabes…Ademais estoucho vendo…

-si, xa sei, é raro mais é así, podes velo mais non cho podo dicir.

– E logo porque non podes? Mandaronche no cole que non mo dixeras?, iso sería moi feo…

-non, ho, que va! O que pasa é que eu sempre digo a verdade, por iso non cho podo dicir, porque se che difo a verdade vai ser mentira.

XMEYRE (2007)